英格蘭世界盃大軍啱啱到咗邁阿密為今夏世盃進入最後備戰，而最吸引我目光嘅係左閘巴尼斯（右）帶埋結他到埗，原來呢名拖肥糖後衞唔單止係足球員，仲係音樂人。
雖然球員閒時鍾意做啲乜係佢哋嘅自由，但當見到足球員喺代表國家出征時戴住大大個headphone喺度扮cool，我話之你真係有好高嘅音樂造詣，都覺得好反感；反而今次見到巴尼斯孭住個大結他，慢慢聽歌咁入營，感覺又好良好喎！原來，巴尼斯好鍾意獨立音樂，閒時仲會玩番兩手；不過，佢話：「啲人提起足球員，一定將佢哋定型，認為佢哋鍾意R&B及Hip Hop等呢類音樂，原來又係真㗎喎！我試過喺更衣室播獨立音樂，啲隊友話好難聽。」
其實身為英格蘭左閘，仲有一樣嘢會俾人定型㖭，就係被傳為「基民」。遠至拿索斯，到艾殊利高爾，甚至係新晉嘅勞基梳爾，都被傳係同性戀者；巴尼斯玩另類音樂反而冇俾人傳，可能因為外型夠「踏實」囉！
文：吾中
以女性角度看球星新聞，唔用眉筆用原子筆寫低球壇百態！
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk