「魔童」王維基決定搞埋網購，形容係「走投無路」才出此對策。他的如意算盤是：透過香港電視（1137）所拍攝的劇集，吸引港人為睇劇而購物，令網站有穩定的人流及生意；同時網購穩定的現金流，亦可幫補公司繼續投資拍劇。這個model聽落講得通，但有相關分析員就直言唔睇好，「除非你套套劇，拍出來都好似《星星》咁大效應」，否則在香港規模咁細、人力成本又高的市場，要成功？唔容易。
內地網購盛行，很大程度是因為地方大。有在上海工作超過10年的朋友，曾分享過佢的購物經驗：早在N年前，網上已出現過一些「代購」生意。例如有居住在IKEA旁邊的師奶，由於閒來無事就去逛IKEA，故順道搞埋代購，收番幾個巴仙的交易費用，運費由客人畀，不過加埋十幾蚊就有找。朋友說，由於他們一家住在浦東，佢實在唔會揸車45分鐘、塞一輪車，再去到IKEA只係為買兩隻碗。所以地方大，購物唔方便，是內地網購發展的重要條件之一。而這樣的條件，在香港並唔存在。
要改變香港人現時傾向「出街買嘢」的習慣，王維基必須向消費者提供到足夠強烈的理由。與其說是劇集吸引，海迪反而覺得，王維基最大的籌碼，是有香港人的情感支持。但這是否可長期轉化成為生意？這條數只怕好難計。
海迪
【壹錘定音.李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk