細個讀書時，教科書講到GDP的缺點時，總會提到「無法計及地下、非法的經濟活動」。不過只要識得「Gamtrulia」（發音係Gam-tru-lia），意思係「監粗嚟」，毒販、妓女都可以貢獻GDP！
繼意大利後，自今年9月起，英國GDP將破天荒計入販毒、賣淫嘅貢獻，料推高當地GDP達10億英鎊。問題係呢類經濟活動，都納唔到稅，條數又點計呢？以英國為例，賣淫方面，統計部門由供應層面入手，假設2009年全英有60,879名妓女，每人每周接25單生意，平均每宗收費67.16英鎊。至於毒品市場則由需求去睇，假設英國有220萬人吸食大麻，估計全年消費總值12億英鎊，當中有一半為住宅種植，更加衍生出總值1.54億英鎊嘅電力、原材料消費。
而家GDP計算變成「斷估冇痛苦」，對國家來講，好處當然多的事，尤其是歐盟國家。推低債務對GDP比率，一來可應付歐盟標準；同時理論上有更大空間去借錢。當意、英都咁做時，其他歐盟國家又點會執輸？特別係西班牙，市場估計非法經濟活動佔整體兩成！非法活動冇單冇據，GDP監粗靠斷估谷大條數，亦難免會令人懷疑，國家唔夠數時會造假，含水量成謎。以後望住條數，打幾多折就睇你有幾信個政府。另外，菲菲facebook fanspage終於面世，多謝支持。
Fifi
http://www.facebook.com/lovefrystock
本欄逢周二、四刊出
【壹錘定音.李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk