政務司司長林鄭月娥前日出席「萬家同樂賀端陽」活動，有表演者向佢展示標語：「林鄭司長：作為公民，我想有得提名您！！」據聞林鄭見到又笑又拍掌，可能佢內心都好支持公民提名。
展示標語嘅係社工陳少麟Gary，佢接受邀請上台表演魔術，知道林鄭做嘉賓，趁機向佢表達特首普選要有公民提名嘅訴求。Gary認為公提可以逼到特首睇重市民嘅需要、政策會更貼近社會，而且有咗民意授權，施政都唔會咁多阻滯。
約40歲嘅Gary本來係全職魔術師，後來轉職社工。舉牌到底有冇用？佢話社工都讀過希臘神話裏面西西弗斯推巨石上山嘅寓言，有啲行動係永無盡頭而徒勞無功，但係過程快樂，所以應該做：「我相信大多數香港人都係擁抱民主普選嘅，我嘅行動只係一個小社工嘅一小步，如果每個香港人都可以用自己嘅方法踏出一小步，成個社會就可以踏出一大步。」
Gary仲話社工大致上認同普選，但對政改方案同佔中運動分歧好大，因為講到身體力行參與佔中，大部份人覺得有人爭取就得喇。佢個人好支持佔中，認為係同建制對話交手嘅唯一方法。
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk