法國大鑊鳥！頭號球星列貝利背傷手尾長，搞極都未復出得到，周日仲有法國傳媒話，列貝利有機踢唔到世盃。我求大俠覺得列貝利年頭表現低迷，冇上年咁搶鏡，𠵱家背傷纏身成個月，就算趕得切踢世盃，狀態都唔慌好。
法國友賽1:1和巴拉圭
列貝利嘅背傷都醫咗成個月，上月中嘅德國盃決賽叫做復出過一陣，幫拜仁慕尼黑加時贏多蒙特捧盃，但呢位法國中場都唔太掂，上半場後備入替拿姆後，但踢到加時又要被換出，可見列貝利嗰陣係負傷頂硬上。
法國《隊報》星期日仲爆料，列貝利背傷太嚴重，短期內好唔番，好可能無份踢世盃。法國喺報道當晚友賽巴拉圭，雖然列貝利有做後備，但佢坐足全場，仲未復出得，更為《隊報》嘅爆料增添可信性。法國喺呢場比賽靠皇家蘇斯達前鋒基沙文入波，同巴拉圭踢成1:1。
基奧特：佢好嬲自己
賽後，法國前鋒基奧特亦大爆列貝利非常擔心，好驚俾背傷搞到冇得踢世盃，「列貝利開始嬲自己，我唔太清楚佢嘅傷勢，但佢好擔心，情緒受傷勢困擾。我哋一定要幫佢堅持落去，同埋要有耐性。我早前傷咗3日，都已經六神無主，因為世盃就快嚟到！」而教練迪甘斯就較樂觀，「列貝利有背痛，若果未能痊癒，就唔可以踢波。我唔打算談及醫療嘅範疇，但我哋會盡全力去幫列貝利恢復最佳狀態。」其實列貝利今年都跌咗watt，自從金球獎輸俾基斯坦奴朗拿度後，表現都冇好過，幾場歐聯淘汰賽踢到好似隱形咁。今日離世盃開鑼得9日，就算列貝利即刻操得番，都好難有十足十嘅狀態。
大將受傷，場友賽又麻麻地，好彩法國抽到支好籤，D組對手只係瑞士、厄瓜多爾同埋洪都拉斯；其中首場分組賽對手洪都拉斯頹到震，仲衰過法國，上場友賽輸咗俾以色列2:4，熱身賽連輸兩場。
識睇 一定睇蘋果嘅足動世盃：
http://worldcup2014.appledaily.com/
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk