送報T慨嘆二十年來雜誌報紙售價不變（頂多有微調），但全港報刊銷量下滑，於是送報（發行），賣報（報販）嘅收入大跌。呢條數簡單到極，（粗略啲講）20年前嘅P係20元，銷量V係1000，每期總收入就係20,000元，今日P仍然係20，但V跌到落500，收入於是縮到10,000元，但20年來嘅租金、燈油火蠟、人工、地價，你話升咗幾多？20年前有兩萬都幾過癮，今天得番一萬，就苦苦苦咯。
收費雜誌報紙銷量萎縮，可以親眼睇得到。學生豪話在中文大學校園，佢未見過同學買報紙，頂多係在火車上攞免費報。年青醫生N對左丁山講：「我有三年未買過報紙嘞，每日睇蘋果都係用iPhone睇，屋企根本冇一份舊報紙，好乾淨！」好似肥仔K呢類80後，每日要攞走屋企訂閱嘅INYT與FT（由老竇俾錢），簡直係異形異類，所以佢話坐火車返工時打開份FT，好易受注目禮！因為大部份人都係低頭族，用手機睇蘋果動新聞吖嘛。
好似左丁山每月付鈔一千元訂報嘅人，恐怕就快絕跡。最近報販送報時附上字條，追討上月報費，一查之下，先發覺張收費單唔知擺咗去邊，唯有即刻補付。呢樣係小事啫，但記得二十年前，有三四個月報費近四千元未曾找數，打電話搵派報人，佢竟然話：「小事啫，慢慢先啦！」直情唔追數，要勞煩左丁山追佢攞單。時移世易咯，20年後，遲交三幾日都俾派報人追討，可見佢地現時生意零落，要寸土必爭，昔年係肥豬，今日變成餓貓吖嘛。
荷包太肥，就會懶懶閒，夠挑剔，做老闆搵客戶又有編輯大原則不可違背。到荷包輕晒嘞，雖不至囊空如洗，人就會緊張搵銀多啲。2014之香港與2003年之香港，就有如此分別，當年歡呼自由行救市，今年喝駡自由行遊客破壞本土生活，如此原因而已，邊度駛去搵甚麼深層意識、意義吖，賢者如「時代雜誌」也不能免，打破91年光榮傳統，委屈地在封面刊登小廣告。睇落以後只有深入、認真評論及有影響力嘅收費報紙先至有生存空間，賣八卦新聞活色生香動態嘅即食快餐報刊，邊度夠網上新聞鬥吖。
【壹錘定音.李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk