新亞師弟盧永雄喺佢嘅「頭條日報」專欄講及美國著名雜誌「時代」嘅苦況，竟然在封面加插一則小廣告，為咗錢，不惜違反美國雜誌編輯協會編輯指引第一條：「封面是編輯和出版商的品牌聲明，不應直接在封面刊登廣告」，「時代」有91年光榮歷史，美國傳媒素以廣告部與編輯部互不干預，中間有道石牆分隔為傲，點解「時代」呢次（5月22日）肯打爛齋缽？
一字咁淺，就係為咗錢，中國古語有云：「發財立品」，有財就有品，無財則為五斗米折腰矣。今日美國嘅現實就係失業率比較高、勞工參與率在歷史低位，讀文科揸筆搵食嘅人士，失業率尤其高，與「時代」競爭幾十年嘅「新聞周刊」已經倒下了，「時代」集團內有暢銷雜誌People 、Sports Illustrated頂住，還可捱落去，但控投公司見銷路廣告日跌，將「時代」、「人物」、「SI」三份雜誌嘅營運合併，裁減500人，你話呢500位去邊間媒體搵工吖。
口袋裏有個錢，站在道德高地，講嘢就零舍清高，譬如講周末耕田消閒，就有人引伸到回歸農村，振興農業。笑死人咩，香港可以靠農業支持（即使係小部份）GDP及七百萬人生計？又譬如話不要自由行，不只削兩成自由行遊客（梁振英下巴輕輕隨口噏）咁少，而係削減到只剩番兩成咁巴閉，係唔係語不驚人死不休呀？2004年內地開始有大量自由行遊客來港，嗰年嘅總人數係1225萬人，十年後到咗2013年就升到4074萬人，如果削剩兩成，就係得番八百零萬人，廣東道、羅素街不蕭條幾稀耳，到時舖租，樓價仲唔大跌咩，零售業、酒店業、廣告唔裁員就勢係假。
與送報T講起，佢話好呀：「到時啲年輕力壯人士就會冇咁大牌，有皇馬對馬體會大戰，第二朝就告病假，有世界盃睇，就講定休息番一兩個禮拜先，人工就我俾，蝕本當然係我蝕，話『時代』缺廣告而要出賣編輯原則？梗係要啦，好似我咁，報紙雜誌二十年唔加價，而全港所有銷量跌咗一半都唔止，即係話我地呢行佔報販收入少咗五成，但人工仲係要加，工人又難請，點搞呀？遲早玩完，印刷傳媒已進入善終狀態！禁止自由行，等啲人少啲工做，人工加得冇咁快，我地或者仲可以苟延殘喘！」
【壹錘定音.李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk