【本報訊】遊行示威集會屢見大型道具，每每正中要害，就似在當權者臉上狠摑一巴。四分一世紀過去，六四屠殺未平反，面對有人開始顛倒是非、冷言相對，阿牛與一班義工連夜嵌製八呎長坦克模型，重現王維林隻身擋坦克前進的畫面（圖），向新生代傳承真相。
5月天炎熱昏暗的工廈走廊，「阿牛」曾健成與五、六個義工，用三輪單車、木板和鐵支架，花費3,000元造出殺人政權的終極象徵。坦克車模型長八呎、闊約四呎，炮身長逾六呎，「場地所限，要入𨋢，如果唔係可以做更大架」。
03年開始，阿牛每逢大型遊行示威，都會製作道具表態，這架坦克是他製作過最大的一部。「當日坦克車輾過天安門鐵欄、輾過學生，好慘痛，我哋冇忘記歷史。四五十歲嘅人好清楚當年發生咩事，但八十、九十後未必知道，我想透過坦克，勾畫歷史畀大家知」。
「我唔想做豬 要面對歷史」
「我哋必定要追究屠城責任。25年唔得，我哋都仲係會鍥而不捨」。阿牛說：「嗰團火、嗰個心，未熄過。」努力為坦克逐筆上色的義工歐陽東，形容自己在還債，「如果唔係當年死咗咁多北京學生、市民，我哋唔會醒覺自己活喺擁有民主自由嘅香港，97過去就會懵閉閉俾中共食咗」。他說，當年犧牲者是用生命提醒人民，「如果我唔爭取，就會同馬力口中所講，俾坦克輾過嘅豬冇分別。我唔想做一隻豬，要做一個人就必須面對呢段歷史」。
【六四25周年專頁】燭光不滅，血仍未冷，民主中華，花果漂零。蘋果請你一同見證：良知，從未貶值！ http://64.appledaily.com
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk