許仕仁新地案開審，一波三折，陪審團還未正式開工，已經解散，要押後到六月四號再開庭，到時再選過九個陪審員。呢件世紀大案到幾時先至審完，一了百了，冇人敢講得實，原告與被告都難以承受輸官司嘅壓力，理由唔駛多講，碰啱原告係政府，有使不完嘅錢，全部由納稅人提供，而被告亦有雄厚財力，（許仕仁已被法庭宣判破產，係例外，但必要時佢可以申請法援，由納稅人付鈔打官司），故此高院一審，上訴法院二審，終審法院三審，可視之為必然，雙方糾纏兩三年，一啲都唔奇。
搞咁耐，要幾多錢？因原告被告雙方盡聘名牌大狀上庭，有外援來自倫敦（御用大律師），有本地猛龍（資深大律師），再有律師樓派精英律師支援，每月嘅使費肯定高得離譜，因一位大狀打一堂官司已要起碼五十萬元（亦可高至一百萬元），若粗粗地計算，每方每日用一百萬，兩方就係二百萬，乘以審判日期一百日，就係兩億元，呢個數字已係最低消費。左丁山在午飯時講呢個數字，即刻俾財務總監P唓咗一聲，佢話：「止唔止呀。」左丁山唔敢同佢爭論，因為係靠估啫，近日有報紙講，一位紅牌大狀代人出庭旁聽（淨係聽啫）一日，已經收費30萬嘞。
官司訟費如此高昂，除咗政府可以用納稅人公帑付出外，香港市民或者只有少於1%嘅人可以負擔得嚟，唔怪得好多讀書尖子恨做紅牌大狀。不過要成為在山頂居住獨立屋嘅大律師，過程不易，除咗讀書叻，英文一流（如Tree Gun咁嘅口語英文，就要死咗條心，無謂浪費時間）之外，仲要遇上名師帶你出身（例如黃仁龍得李國能收為徒弟），捱番幾年平淡清苦生活先，冇毅力就難以日後成為大器嘅嘞，左丁山知道有啲大狀不論華洋，要靠補習英文嚟維持職業生涯，等待突破機會呀。做律師反而可以早啲有收入保證，好似律師F位公子，一自港大畢業就入咗國際大行，十年來從見習律師做起，專事企業理財，公司上市（IPO）等事務，嗱嗱聲就年薪達7位數字，同輩欣羨，可惜呢，做corporate finance工作，往往不分日夜咁死做，拍拖都冇時間。而律師F恨抱孫，每次見到左丁山就話：「我個仔重係單身，你識咁多人，有機會就介紹吓。」唯有應承住先啦！
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk