【記者呂麗嬋報道】英國第二大戲院Cineworld，上月入稟已結業的華懋戲院，追討未完成合約的損失，香港唯一印度院線在華懋完成歷史任務，26歲的黃嘉欣（Sonia）最傷感，「華懋係老牌戲院，喺度睇戲似去咗印度」。主持網台及facebook專頁推介印度電影，吸引兩岸網民追讀，又到重慶大廈，購買印度觀眾為主的包場戲票，成為大銀幕之下的「少數民族」，「好多人對印度片好大偏見，未睇就一口咬定話唔好睇」，由睇戲到做人，撇除先入為主的偏見，彈丸之地，小妮子說另有天地。
寶萊塢（Bollywood）唔係只有歌舞片嘅咩？重慶大廈好亂，唔好亂咁入！曾幾何時，Sonia與大部份香港人一樣，都是這樣想。「以前只睇歐美電影，覺得印度片好怪」。這種怪，大抵源自不認識。記者隨她走進重慶大廈，只見她逕自走到二樓的DVD店，堆滿雜物的小店，原來是臨時「售票處」，坐在櫃枱的印度大哥態度友善，電影海報上貼了電影場次，一張戲票盛惠150元。
印度做義工 越看越着迷
「香港人習慣上網煲劇睇戲，但對於印度人嚟講，上戲院係好重要嘅家庭活動。」Sonia解釋。這條鮮為港人知的印度院線，由Cineworld獨家經營，定期引進最新印度電影，以包場形式放映。據知Cineworld上年底與華懋達成維期兩年的協議，最終卻因華懋結業無法兌現，鬧出訴訟，「以前院線嘅戲會固定喺華懋放映，自從華懋執咗，就轉去重慶對面嘅UA iSQUARE」。
住上不同國籍人士的重慶大廈，向來有「小聯合國」之稱，其中印度人是「大戶」。娛樂性豐富的寶萊塢電影，最解鄉愁。香港人只知《作死不離3兄弟》和奧斯卡得獎電影《一百萬零一夜》，重慶大廈內的DVD店，都是來自異鄉的電影達人，由廉價DVD到大銀幕上映的出爐電影，如數家珍，「南印同北印電影，已經大不同，香港嘅女孩子，最愛印度劉華。」印度大哥打趣說。
網上寫影評 研恐怖分子
一個印度，單官方語言就有10多種，放下偏見的Sonia，越看越着迷，做了民間推廣大使，她說只是無心插柳，「嗰時仲喺中大讀書，因為要去印度幾個月，諗住借睇戲先認識吓嗰地方」。中大法律系畢業，第一份工在樂施會工作，「好細個已立志喺國際扶貧機構做嘢，當初揀科，都係諗住法律背景對搵呢類工有幫助」，暑假同學都在律師樓實習，她到印度做義工。
結果，義工做完了，她與印度電影的緣份卻沒有完。「鍾意睇戲嘅人都有一個共通點，就係好想推介畀其他人」。走進重慶大廈買包場戲票，又將看過的幾百套印度電影寫成影評，在網上分享，撰寫探討從印度電影看恐怖分子活動的另類評論，竟吸引中台兩岸網友追看，「台灣人睇戲最投入，又會着印度傳統服裝入場睇，之前澳門舉行印度電影頒獎禮，大家仲約埋一齊去追星！」
由推介好片到推廣印度文化，她就是有一股盲勁，就如選讀法律卻無意做律師。「如果去做律師，或者可以向上流，做所謂嘅中產，但我肯定，唔係我最想做嘅嘢」。出身基層單親家庭，媽媽在安老院做護理工作，因為讀書標青考上法律系，卻又希望用自己的知識，回饋社會上有需要的人。
「喺印度做嘢，令我知道，一個人喺大環境入面，影響好有限，但你幫到一個人，呢種感覺好實在」。中學開始做兼職交學費，世界艱難，她一早就知。「我慶幸有一個好媽媽，畀好大嘅自由我，教識我唔好因為一個人嘅身份地位，影響對呢個人嘅睇法」。
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk