HK POP的始祖，可算是80年代尾組成的草蜢，由畫眼線、濃妝的草蜢仔進化到現在跳足29年，本周六起在紅館開6場演唱會，主題三位一體Be Three，亦是同音字freedom。入場觀眾的壓力，到時盡情跳舞撥走不滿。三人似有「長生不老」技術，笑謂越跳越年輕，拉筋鬆一吋，長十年命。
撰文：王連連
近年草蜢在演唱會創造「草蜢文化」，音樂響起觀眾自然「彈起身」跳舞，今年演唱會口號「我要跳舞，唔跳會老」，蔡一智笑謂：「呢幾年本身唔覺得我越跳越年輕，係親友話我後生過以前，我冇辦法唔覺得係真。」蔡一傑說：「以前諗過40歲後唔知仲跳唔跳得郁，點知跳跳吓都過咗我哋講嘅年紀，都覺得越跳越輕鬆、年輕。」蘇志威笑謂：「每日拉吓筋就會越嚟越鬆，啲筋鬆一吋，命會長十年。」三人笑謂最近排舞又長壽了。
派牌變舞步
草蜢初組成在百多呎屋企練舞，三人互相做對方鏡子練習，經常通宵諗舞步，蔡一傑說：「生活上啲小細節、留意街上嘅人動作啟發靈感。《ABC》我留意到蘇志威玩啤牌派牌時動作幾得意，就變成舞步。而有次去台灣宣傳冇時間排舞，喺飛機睇電視節目有人做手語，靈機一觸手語變舞步，就變成《寶貝對不起》啲動作。」
台下十年功，台上一分鐘，每次一part舞輕輕鬆鬆跳足30分鐘，草蜢花很多時間排舞，兄弟有時互相鞭策，偶然鬥氣，蔡一傑說：「睇住隔籬兩個，永遠都唔畀佢哋威晒，自己要爭氣，呢啲競爭就進步。」蔡一智得戚地謂：「先做好自己，再勉勵其他成員。」蘇志威搭嘴：「做好自己，唔使講，所有人會睇到。」
舞後大審判
三個人排舞不同時間上手，其餘成員各有態度，蔡一智說：「四個字，睬佢都儍！」蔡一傑則說：「最近我就陪蘇志威喇！係咪最近有啲舞步跳唔到我陪住你做？」但蘇志威說：「係呀，梗係要還啦，佢跳唔到要我陪佢跳，你認唔認吖？你要我跳嘛，我唔記得喎，你跳啦，你當陪我跳啦，跟住我就跳。」蔡一智仍笑說：「我記好晒瀟灑地咬住麵包走，但佢哋留堂囉，睇住我standard去，可早啲收工，做吓瑜伽。」草蜢全因為別人唱反調而跳得起勁，但最大鞭策力來自兄弟，蔡一智謂每次演出後有大審判：「每場都有錄低，你跳得唔好，喺現場會好血淋淋，睇完playback會俾人鬧，一睇就知，唱錯歌詞，望其他人、唞氣個樣肉酸嗰啲。」
髮型：Jacky Ma
化妝：Eunice Wong
場地提供：海裕魚生壽司店、ARJ Dance Culture Ltd
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk