距離世界盃開波唔夠兩星期，本港各大商場已經開盡Turbo，宣傳旗下睇波活動。噚日將軍澳一間商場打頭陣，請來巴西無腳掌足球神童Gabriel Muniz，分享點樣克服身體殘障，終獲巴塞隆拿賞識參加足球訓練營。
𠵱家13歲嘅Gabriel，出世時雙腳已經冇咗腳掌，但佢自細就非常好動，仲喺唔少體育比賽拎過獎。視美斯為偶像嘅佢，最愛嘅運動當然係足球啦！去年7月佢上過巴西電視節目之後，感動咗西甲勁旅巴塞隆拿邀請佢同美斯見面，仲請佢參加足球訓練營㖭。
來港巡迴獻技4日
唔好以為冇咗腳掌，平衡力一定好差，踢開前鋒嘅Gabriel喺台上頭頂腳踢毫無難度。講起自己嘅奮鬥史，佢就話：「足球帶畀我好多喜悅，每日除咗返學，我就會日夜苦練球技。所以即使之前去巴塞期間，應付訓練都唔覺有特別困難。」睇佢噚日同晨曦足球學校小將何瀧浩過招，表現一啲都唔輸蝕，連擔任嘉賓嘅東方沙龍教練高尼路，都話好佩服佢嘅毅力，大讚佢技術一流。呢位小豆丁仲話：「美斯係我嘅偶像，將來我希望可以好似佢咁，做到一個偉大嘅足球員。」嚟緊Gabriel會返巴西入場睇世界盃親身感受氣氛；佢呢幾日就會喺香港巡迴表演，先喺今日去上水，聽日去新蒲崗，最後就會喺下星期一返到東港城，同晨曦足校球員出戰3人足球賽。
世盃商場show浪接浪
除咗Gabriel嘅勵志故事，今屆世盃宣傳活動都幾多元化（見附表），要球星有球星，要集體回憶亦有。好似喺6月8日，荷蘭名宿古列治同前英格蘭國腳奧雲分別會喺觀塘同將軍澳見球迷；而喺銅鑼灣，經典漫畫《足球小將》展覽已經開始咗，網上已經流傳緊唔少球迷同5.5米高小志強模型嘅合照喇。
識睇 一定睇蘋果嘅足動世盃：
http://worldcup2014.appledaily.com/
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk