梁振英在五月廿二日於立法會答問大會借題發揮，大罵立法會拉布，指社會對議會頻頻出現議員拉布「深痛惡絕」，左丁山有睇直播，聽到佢咁話，知道佢講錯咗嘞，應該係「深惡痛絕」先至啱。左丁山在中大時，大一、大二國文必讀《孟子》，知道《孟子》：「盡心章句」下，有「何如斯可謂之鄉原矣」一句（當年讀蘭州大學出版楊伯峻之《孟子譯注》，2004年2月中華書局版，第14.37段），宋朱熹集註有解釋：「過門不入而不恨之，以其不見親就為幸，深惡而痛絕之也。」
深惡痛絕之現代白話文解釋就係深深厭惡！極端痛恨，係語氣非常重嘅言詞，一般不輕易使用。假如有土豪在鄉下橫行霸道，勾結官府，賄賂公安，逼良為娼，淫人妻女等惡行，鄉民就可講對土豪之行為「深惡痛絕」。陳偉業等借派錢及爭取全民退保之名在立法會拉布，浪費時間，雖然惹人討厭，但係在議事規則之內，算係踩鋼線打合法衝撞，點都唔算得上係令人「深惡痛絕」嘅行為，梁振英嘅用語，其實係過份咗嘅。以前啲高官，批評陳偉業等人拉布，咪最多講句「令人極度不滿，深感失望」諸如此類，今梁特首用上「深惡痛絕」一詞，直情係割席之餘還想開片啦。
五月二十三日《大公報》報導此事，知道梁特首講錯咗「深痛惡絕」，甚為客氣，只係在標題上改番為「深惡痛絕」。最過癮嘅，就係《頭條日報》第六版出現如此標題：「答問大會史上首腰斬，梁：拉布『心痛惡絕』」，內文直寫梁特首指社會對議會頻頻出現拉布「心痛惡絕」。《頭條日報》勝在新聞多，有時幾有趣味性，但出現如此標題，對中文有認識嘅讀者確係幾「心痛」，可能編採人員甚為年輕，不知道梁特首掉錯書包，咪以為特首感到「心痛」囉！
孟子章句下嘅名句至今流傳嘅有「盡信書不如無書」（14.3段）；「民為貴，社稷次之，君為輕」（14.14段），「馮婦」（14.23段），「說大人，則藐之，勿視其巍巍然」（14.34段）。今日內地嚴打貪腐，盛傳周永康遭軟禁，賀國強子賀錦濤受調查，連同薄熙來等等涉嫌貪污等高幹，落馬者十隻手指數唔晒，當初佢地如果讀吓孟子曰：「諸侯之寶三：土地、人民、政事。寶珠玉者，殃必及身」（章句下，14.27段）就或可獨善其身啦！凡大官不以治理土地、民生，行政管理為寶，反以珠玉為寶，必有大禍。
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk