《水滸傳》裏面嘅潘金蓮同西門慶不得善終，不過喺現實世界男歡女愛又邊有惡有惡報呢回事。效力意甲森多利亞嘅阿根廷前鋒麥斯盧比斯，俾𠵱家效力國際米蘭嘅同胞莫路伊卡迪撬走佢前妻雲達，仲俾雲達喺網上唱，話伊卡迪先可以喺床上滿足到佢。雲達同伊卡迪終於喺日前正式結婚，希望一再受挫折嘅「武大郎」盧比斯將呢件事當係告一段落，move on吧。
大爆一晚搞15次
麥斯盧比斯同莫路伊卡迪曾經喺12/13球季一齊效力森多利亞，大家都係阿根廷人自然好快做老友，佢哋加埋當時仲係盧比斯老婆嘅雲達經常3人行四圍去，點知搞搞吓伊卡迪同雲達擦出火喺埋一齊。兩個搭上咗之後一啲都唔避忌，雲達之前仲大呻獨守空闈好苦悶，但同伊卡迪就快活過神仙，仲唔介意爆埋曾經一晚搞咗15次；盧比斯俾人笠綠帽之餘仲要俾前妻唱，唔嬲就瓦燒，曾經喺電話留過言畀雲達，警告話想打爆佢兩個個頭。
「雲達打吡」再輸一仗
情場失敗，球場上一樣失敗，盧比斯喺今年初再次被借去森多利亞，喺4月場意甲主場對國際米蘭，賽前拒絕同伊卡迪握手。開波後盧比斯曾經有射12碼機會點知宴客，反而伊卡迪就幫國米梅開二度助球隊大勝4:0，呢場波亦被球迷戲稱為「雲達打吡」。
球季完咗之後，伊卡迪喺周二返阿根廷同雲達正式結婚，只係請咗12位親朋好友嚟觀禮。不過據講佢會喺下星期補擺酒，仲會有咁大搞咁大，請埋一班國米隊友嚟到賀，不過我求大俠估計伊卡迪點都唔會派帖畀盧比斯啩。
輸咗場波可以喺下一場再努力，女伴走咗仲結埋婚其實又唔係咁灰；相信盧比斯都明白呢點，已經做好準備再嚟過。上星期喺邁阿密有人影到盧比斯同新女伴一齊喺沙灘曬太陽，話知伊卡迪同佢前妻搞乜鬼都唔理咯。
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk