【牛腩篇】上季玩完馬後炮，今季就做預言家，同大家一齊睇吓嚟緊周末有咩好睇。
同貴為大英帝國嘅前殖民地，香港球迷又飲慣英足盃同英超奶水大，自小弟識性以嚟，每逢世界盃，香港嘅電視台都花費好大篇幅介紹英格蘭，講吓66年點勁點勁，講吓86、90點慘點慘，加上睇慣英超，又自不然以為集合英超球星嘅三獅兵團，點樣以最強陣容出師日韓、德國、南非......結果呢？
今時今日，仲信英格蘭可以贏巴西世界盃嘅香港球迷已經唔多，或者要多得689嘅國民教育啦。不過被睇淡反而冇咩壓力，我覺得英格蘭今屆世界盃會唔錯喎。
英格蘭以往都不乏翼鋒，右翼更人才輩出，阿仙奴嘅禾確特因傷缺陣，似乎影響唔算大；睇利物浦嘅史達寧最後幾場聯賽，要傳中有傳中，要入球有入球，仲有拉爾拉拿、阿歷士張伯倫同占士米拿都可以打呢個位，季初一度上位嘅安祖斯唐辛，直頭連大軍都冇份入，就知英軍右翼競爭幾激烈。
不過禾確特同世界盃嘅有緣無份，亦都令人婉惜，06年入選大軍名單，但俾當時領隊艾歷臣安排做最近嘅觀眾，上屆就俾卡比路棄用，到今屆又因傷缺陣，講吓講吓禾仔都已經25歲，如果下屆世界盃又有咩三長兩短......
睇英格蘭當然唔係睇佢哋球技，佢哋嘅WAGs先夠爆，冇禾仔即係冇美蓮妮，唔通真係逼我日日睇高蓮（左）？文：牽牛
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk