【壹週刊】嘩！飲到貓晒喎！冇咗天后老婆王菲做靠山嘅李亞鵬，上個禮拜秘密嚟咗香港摸酒杯底搵老細呀！
同王菲離婚之後，李亞鵬即時現形，被影到攬錫新歡，加上「嫣然天使基金」被指部分善款下落不明，形象一鋪清袋。
上個禮拜四（5月22日），佢搵埋黃曉明同Angelababy，同昔日一手將自己捧紅、無綫宇宙膠劇《西遊記》製作人張紀中見面，口講話聚舊，實則係想泊住張紀中呢個碼頭，搵水喉開劇。啱嘅，冇咗王菲嘅人脈，李亞鵬係要落力啲自己搵老細架喇！
熊抱完黃曉明之後，李亞鵬就同胡軍趕去梁家輝老婆嘅生日派對。飲到12點幾先鬆人嘅李亞鵬，腳步浮浮，要兩個大男人夾實扶上車。
喺香港搵完老細，兩日後李亞鵬已經飛番北京，同王菲合體，幫李嫣舉行8歲生日派對，勢要守住好爸爸呢個形象。
iPhone App免費下載： http://bit.ly/nextplus_iphone
Android App免費下載： http://bit.ly/nextplus_android