近排謝安琪（Kay）喺樂壇可以話全力發展，先同經理人自組公司，跟住又宣佈加盟華誼兄弟，實行中港兩地雙線發展。
但噚日有網民喺討論區留言，發現阿Kay上個禮拜喺華誼兄弟嘅記者會，佈景板嗰張全身相竟然同舊年加盟台灣金牌大風記者會布景板嗰張一模一樣，馮仁昭睇過啲相，唯一唔同只係全身同半身嘅分別，明明係兩間唔同嘅公司，竟然會用同一張相，睇落又真係比較慳皮，既然係加盟新公司咁大件事，做乜要用舊相，而唔係影一輯新相呢？當然亦都有人撐阿Kay，可能係諗住環保，話晒影一輯相，又要着新衫、又要化妝set頭、仲要book影樓開晒燈影相，咁咪釋放好多碳排放量囉！
香水帶入戲
另外，阿Kay最近亦都為蘇永康嘅廣東新歌《有過你》拍MV，蘇永康（阿公）話一諗就諗到阿Kay，阿Kay仲話：「阿公好聰明，佢帶咗私伙香水到場，幫我入戲，因為有時掛住一個人或鍾意一個人，會諗起對方獨特味道，我就係用呢個感覺去演。」
撰文：馮仁昭
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk