【咖喱篇】上季玩完馬後炮，今季就做預言家，同大家一齊睇吓嚟緊周末有咩好睇。
細細個就睇傑斯踢波，嗰陣已經覺得好遺憾，因為每逢世盃同歐國盃，都一定見唔到佢。𠵱家傑斯掛靴，新一代嘅加里夫巴利（圖）睇嚟會延續呢份遺憾。
睇到巴利今季喺皇家馬德里嘅表現，尤其係西班牙盃嗰球跑外線，屈速爆贏馬斯巴查，真係拍爛手掌！小弟真係好想睇佢踢世盃，睇佢點樣繼續屈速，同埋有冇計屈個世盃冠軍返嚟。講起步速同埋跑緊嗰陣嘅步幅，巴利真係冠絕頂級球員，仲記得佢爆過沙格拿、里奧費迪南同馬爾干，真係由細爆到大，都仲係咁爆得。世盃應該係雲集全球頂尖球員嘅賽事，有技術屈機嘅美斯，亦有身體對抗性爆燈嘅基斯坦奴朗拿度（C朗），可惜見唔到速度方面獨霸一方嘅巴利。
有人話，今屆唔得啫，咪等下屆囉！小弟睇吓威爾斯嘅陣容，真係見唔到巴利參加世盃嘅希望。喺當打球員入面，只係得艾朗藍斯叫做有番咁上下，之後數落去已經係利物浦嘅冷板常客祖阿倫。後防方面，有史雲斯嘅艾殊利威廉斯，但佢4年後已經33歲，後防青黃不接都幾嚴重。講到單天保至尊，巴利帶呢隊威爾斯嘅難度肯定高過C朗帶葡萄牙，始終葡軍人腳唔錯，比比同摩天奴呢啲都係一線球員，而威爾斯就得藍斯幫到手。文：咖喱
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk