曾幾何時，中環賓架與分析員人人有部黑莓手機喺手，可惜黑莓近年俾iPhone同Android手機逼到冇碇企，研究機構IDC更估計，黑莓手機全球市佔率將會由今年嘅0.8%，縮減至2018年嘅0.3%。咁同冇人用有乜分別？不過黑莓行政總裁程守宗就好有信心，話公司有八成機會可以翻身！
程守宗承認公司有好多問題，但仲未死，有信心可以救番呢位病人。之前程守宗話公司翻身機會係一半一半，早兩日就話機會率增至80%。
佢舊年底掌舵後，確係幫黑莓做咗好多大手術，包括將公司轉型至專注流動數據、保安服務等，又將公司軟件公開，供競爭對手使用。不過外界似乎唔睇好，IDC估計，黑莓今年全球智能手機嘅付運量，將減少一半至970萬部。時間說明一切，大家即管睇吓呢位病人救唔救得番啦。
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk