泰國老友A前星期來港幾日，以便避開吓曼谷啲政治緊張氣氛，左丁山準備請佢食飯，點知佢話收到曼谷電話，要佢參加一個政府智囊會議，為經濟把脈，諗吓刺激經濟招數，所以佢會提前一日走人，唔得閒。左丁山笑佢：「乜你咁重要嘅咩，英祿已經俾憲法法庭趕咗下台，看守政府點解咁睇起你呀？」老友A嘆一聲：「我從來未做過官，但好多法政大學校友、同學係在朝主力，尤其係經濟、財政方面，佢地叫到，咪講幾句真心話當係書生報國囉。」
言猶在耳，老友A上機回曼谷之日，泰國軍人已正式宣佈政變，軟禁晒紅衫軍、黃衫軍主要份子，陸軍執掌大權，臨時總理也被廢除權位。泰國政變，本來閒過立秋，但呢次政變，相當奇特，事後孔明咁睇又係「鄭伯克段於鄢」嘅招數，陸軍明知英祿政府軟弱，警察無能，反對派素貼可以肆無忌憚咁在曼谷市中心大搞示威、遊行，沒完沒了，嚇走遊客，搞咗幾個月，曼谷市民對示威遊行已經厭煩嘞，然後來一招「司法政變」，以莫須有罪名令英祿下台，刺激起紅衫軍在曼谷市外聚集示威，隨時入城與素貼死過，苟如是則國家秩序行將蕩然無存，人民開始擔心動亂爆發。
陸軍就在此時刻利用槍桿子奪取政權，聲言不准示威，維護國家社會穩定，暫延大選，而大部份人民竟然接受噃，可見陸軍掌握民心民意極為準確。沒有獨立法治支持嘅民主選舉制度，好容易受到破壞，讓野心軍人乘虛而入。
泰國老友A返曼谷獻策，一落機就知道變成大啞巴，哭笑不得。與此同時，肥仔K嘅泰國同學V與太太來港度周末，先去昂坪拜大佛，再去淺水灣拜觀音，對肥仔K講，拜大佛比在曼谷入佛寺更加心境寧靜，忘卻煩憂。肥仔K問及如何睇政變，同學V云：「反政府派、擁政府派，同是衰人，由軍隊管控泰國，恢復秩序，樂得耳根清淨！」肥仔K為之吃了一驚，因為同學V嘅父親亦係法政大學畢業生，41年前上街反軍事獨裁爭取民主選舉嘅，同學V算係見過世面，出國留學人物，何解會不反對軍人搞政變？哀莫大於心死，此之謂也，泰國民主黨副主席素貼反他信，不按理出牌，最終雙手埋葬泰國民主，是為泰國國賊。
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk