呢幾年中資電訊股表現麻麻，每次股東會都有股東投訴股價表現，為消小股東怒氣，幾家電訊公司都想盡辦法去取悅小股東。繼中移動（941）上周送80元中移動電話卡後，中電信（728）噚日就為小股東影寶麗萊即影即有相，影完仲送埋簡單相架。
雖然唔係貴重禮物，但呢份用過「腦力」嘅心意都幾受小股東歡迎，吸引唔少人排隊，有小股東影完唔滿意仲再影過。就連董事長王曉初同財務總監吳安迪都好有興趣，影埋一份，可惜佢哋冇安排同小股東合照，否則呢條橋就更加有意思。
順帶一提，小股東水準越來越高，噚日有股東質疑中電信共有執董9人，竟有6人退任要重選，有乜差池，公司董事局都幾危險，當然最後都係全部執董獲重選。小股東竟然注意到呢啲細節，管理層以後應該要做定更多功課。
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk