為咗贏波，你可以去到幾盡？溜馬喺落後場數1:3嘅情況下，周三喺NBA東岸決賽第5場主場驚險地以93:90贏咗熱火，仲有機會入總決賽。溜馬今場贏波功臣除咗有第4節發威，一個救全家嘅保羅佐治（PG）之外，最搶風頭嘅應該係奇招盡出嘅射手L史堤軒臣喇。
可能見球隊已經連輸3場，再輸多場就要提早放暑假，L史堤軒臣今場就使出層出不窮嘅擾敵招數，希望可以搞掂熱火。
全場精華首先出現喺第3節尾段，熱火教練史普利斯查喺場邊指點緊班球員嘅時候，史堤軒臣就走去聽埋一份，想干擾吓大家。不過史帥全程只係專心同自己啲球員講嘢，眼尾都冇望過呢位不速之客，一副「冇你咁好氣」嘅表情。
占士僅得7分創新低
之不過，有望成為紐約人前輩JR史密夫接班人嘅L史堤軒臣，字典裏面當然冇「放棄」呢兩個字，佢之後繼續發功，令人驚嚇地吹氣入勒邦占士隻耳仔度；見慣風浪嘅大帝都忍唔住擰擰頭，反晒白眼咁苦笑。唔知係咪俾史堤軒臣咁嚇一嚇，大帝今場表現失準，因為個犯纏身，落場24分鐘只係入到7分咁大把，創出個人季後賽生涯最低分紀錄。
賽後占士就話，自己只係專心比賽，唔得閒理史堤軒臣啲小動作，仲強調自己係職業球員，疑似暗寸史堤軒臣唔專業。有記者問到，大帝有冇試過用呢招騎呢防守法，佢就話只係試過對住自己老婆隻耳仔吹氣，而坐喺隔籬嘅獲迪仲笑到停唔到㖭。
PG奪37分追成2:3
而為溜馬交出全場最高37分嘅PG，雖然個人喺第4節貢獻全隊29分入面嘅21分，不過佢都大方將功勞讓畀隊友，話史堤軒臣無論射波、策動攻勢定係挑釁對手都功不可沒，今場贏波都要多謝佢。PG之後仲搞笑咁話，希望史堤軒臣把口冇臭親大帝喎。 （now635台明日8:30am直播第6場東岸決賽）
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk