下屆特首，邊個做最好？如果泛民有得揀，前律政司司長黃仁龍應該係大熱，資深大律師翟紹唐噚日更主動獻身，講笑話如果黃仁龍肯做特首，佢做律政司司長又點話吖！嘩，聽到呢對夢幻組合，唔少人都話好希望佢哋真係組成戰隊，踢走689呢個傀儡。
狼英2012年當選後，政圈一度盛傳翟紹唐係律政司司長人選，最後呢個職位落於袁國強身上。噚日主持最後一次監警會後卸任主席嘅翟少，再度被問及會唔會做律政司司長，點知翟少講咗未來兩年都唔會之後，但拒表明N屆唔做，反而主動點名話如果黃仁龍做特首，佢就考慮做律政司司長。
人生決定受「龍哥」影響
聽到翟少咁講，全場譁然，翟少強調只係講笑，話黃仁龍可能因為呢番說話斬佢喎。查實翟少透露過，人生中幾個重要決定包括申請做資深大狀，都係受「龍哥」即係黃仁龍影響；難怪黃仁龍若然去馬選特首，而且當選，翟少義無反顧幫拖。
咁風趣嘅人，梗係得人歡心，成班監警會成員噚日為翟少搞歡送會，個個都話唔捨得佢，翟少話卸任後可以多番時間湊女以及做運動，那些年讀書時，佢最愛打網球。講到監警會接班人，翟少透露有個心水人選，可惜唔少人都對做公職有顧慮，政府搵適合人選不易。
李八方
mailto:[email protected]
【壹錘定音 . 李慧玲】6月4日正式開咪!
收聽方法: 請留意【壹錘定音】facebook專頁！
https://www.facebook.com/hammerout.hk