【銅鑼灣】杜汶澤之前宣佈休息一個月，趁住休假唔使開工，日前即刻孖住老婆田蕊妮去咗銅鑼灣行街濕平，行咗冇耐佢哋已經有收穫，買到咁上下見有啲攰就上咗附近一間樓上店嘆下午茶，之後又有三名女性友人嚟到會合佢哋兩公婆。席間4位女士言談甚歡傾得非常開心，阿澤不時加兩句講笑搞吓氣氛。
任影唔嬲
坐咗大概15分鐘阿澤眼利發現有記者影相，成班人依然好友善，阿澤仲叫店員請記者食曲奇餅、飲咖啡同食蛋糕。同場食客見機不可失，即時上前要求同阿澤合照，心情大靚嘅佢冇托手踭。
食足一粒鐘之後阿澤負責埋單，一行五個人再繼續行街血拼，其間同行一位女士接咗位小朋友，湊仔嘅責任就落咗去阿澤身上，兼且佢要幫各位女士攞啲戰利品，最後仲要兼任做柴可夫司機㖭，認真唔話得。
遠離是非
另外，阿澤近排俾內地網民追殺話封殺唔睇佢嘅戲，而佢亦冇再出嚟反擊，好多人以為阿澤潛水，事實上原來阿澤已帶埋老婆去咗美國一間佛教學校嘅佛堂禪修一個月。呢個係佢近幾年嘅指定動作，喺呢段坐禪期間會同外界斷晒聯絡，可以話係斷六親，同時又可以潔淨心靈遠離是非。
採訪、攝影：畢紹基、徐錦池
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk