第一，今屆世界盃會係免費電視台直播，換言之，男人少咗一個落酒吧，返大陸，甚至只能去住喺天水圍裝咗收費電視嘅阿強屋企睇波嘅借口。
第二，預計只有住喺偏遠地區，即係只有收到深圳電視台，或者住喺屏風樓，收唔到電視嘅住戶，可以有借口出外睇波。小心你嘅男人特登整壞屋企嘅天線。
第三，如果你真係走得甩喺街度睇波，恭喜你，由於巴西開波時間，大多係半夜3點4點先開波，你真係大條道理成晚唔返屋企。
第四，今屆世界盃，係唔會有巴塞或者曼聯。
第五，即使下一屆都唔會有巴塞或者曼聯。
第六，唔好因為80分鐘都無波入就一口咬定場波好悶，我地約女仔去街，都唔會因為成晚拖唔到手就覺得失敗，雖然，如果有波入就更加好。
第七，唔好再見到有球員拉衫犯規就大驚小怪，咁茅都得嘅。呢啲係職業犯規，拉衫係敬業，拉布亦都係。
第八，當你男朋友睇波講粗口，請你容許佢呢90分鐘嘅放肆，呢個係一個被現實壓逼到無晒想像力嘅男人，難得回復青春熱血嘅時刻，佢真係相信嗰句粗口可以鬧醒個球員㗎。
第九，當你男朋友大叫，你識唔識踢波㗎，你千祈唔好問佢，唔通你又識？
第十，唔好問男友點解一口咬定球員有越位，因為越位同普選，其實都無國際標準。
第十一，唔好嘗試喺男友睇波時候問佢紅衫係邊隊，或者問佢英格蘭勁啲定荷蘭勁啲，因為呢個罪名等於喺戲院睇戲嘅時候問個兇手點死，同睇A V嘅時候問點解要除衫一樣討厭。
第十二，唔好奇怪點解男友一眼就分到成粒豆咁細嘅球員係邊個，佢同樣唔明點解你會分到嗰啲一樽樽嘅化粧品。
第十三，提醒男友，追看世界盃，係唔可以成為，唔做陪審團嘅借口。
【壹錘定音 . 李慧玲】6月4日正式開咪！
收聽方法：請留意【壹錘定音】facebook專頁！
https://www.facebook.com/hammerout.hk