阿里巴巴決定赴美掛牌，萬洲國際又話暫緩上市，本港新股市場今年似乎冇乜大型IPO，投資銀行要搵大生意真係越來越艱難，聽聞，摩根士丹利與中銀國際，最近同籌備緊上市嘅香港航空分手，又少做一單生意嘞。
盡職審查多提問
主要股東係內地海南航空集團嘅香港航空，經常標榜「更年輕，很香港」，舊年底委任摩根大通、大摩與中銀國際做上市保薦人，打算喺香港上市集資超過60億元。
證監會加強規管保薦人後，𠵱家投行做嘢特別謹慎，甚至係每事問。投行過去幾個月跟香港航空做盡職審查期間，就有好多問題問公司管理層。
聽聞，香港航空與兩間投行嘅分手導火線，係同公司訂購新飛機有關，投行早排發現公司訂落大批新飛機，但以公司規模、財政狀況、發展速度，好似唔多脗合，於是提出質疑，公司方面都有解答到嘅。
但係唔知點解，公司近日決定跟大摩同埋中銀國際分手，只係得摩通繼續有得做。其實𠵱家個市靜靜哋，其他投行不防留意下呢單刁，睇吓有冇機會接手做喇。
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk