不是每一個被訪者都是林敏驄、彭浩翔、梁洛施，擅長自爆100，對住空氣也可以煎蛋、開設冇有線電視台講紅雨，又或者，有一位強勁前度可以講一講。
33歲的劉心悠當年停學，由台灣來港一博入行，9年來沒有哄動離奇大新聞，也不多懂得自爆，一直默默地、努力地「靚女」。今年決心放手一博，自組經理人公司做boss，朝住電影人、內地市場進發，「呢個圈，個個都咁努力，所以除咗努力，我仲需要一個方向。」長大了，還要再博的，是告別BB，「一聽到人叫我BB，我就起雞皮！」
撰文：林妙萍
造型：趙潔恆 攝影：郭賢興
化妝：Jan of Annie G. Center
髮型：Eric Chow of Xenter
「心悠BB」劉心悠，多年來以美女、長氣（跑馬拉松）見稱。成也BB，敗也BB，靚女形象太入屋太長效太保鮮，有穩定工作有機會，細水長流。今年約滿舊公司星皓，決定離開再博，找一個爆破點。第一件事自立，開公司簽自己，試打內地市場；第二件事，和陪足多年的「BB」外號講再見。
BB篇： 聽到起雞皮！
千語BB、妍希BB、美棋BB，還有，夏蕙BB、魯芬BB...
網民宅男眼中，受他們寵愛的女生女神，才能擔得起「BB」這個神聖的封號，對象無關年齡、外貌。「心悠BB」劉心悠，屬於第一代BB，原來她頂不住，「我會起雞皮㗎，如果我再聽多次，應該要將個頭撼埋度牆度，呀唔好再講喇！唔鍾意囉，未去到反感，但夠喇！」33歲不是問題焦點，而是BB代表的親密程度，「BB係一個好親密嘅叫法，吓吓啲唔識嘅人叫BB，我就會大叫，救命呀！」樣子保鮮力強，她認為自己在思想上，才更像個未長大的嬰兒，「一向精神年齡，都似個BB，因為冇經歷過要做一些決策嘅事。」
電影篇： 靚係一個障礙。
劉心悠初來港06年第一部電影《阿嫂》，8位巨星伴住，心悠更獲提名香港電影金像獎最佳新演員。之後，所有角色離不開談情說愛的美女，「我一向都想接啲跳開一個同靚有關係嘅角色，但好難，可能因為我拍廣告，好入屋，佢哋拍得我好靚，但呢樣嘢，可以話都係一個障礙。」
參與張家輝首次導演的新作《盂蘭神功》，終於變身女鬼，飾演抱憾而終、未能上台的白面女鬼，稍後再接拍涉及敏感社會題材的港產片「角色好大膽，一兩年前真係唔會考慮呢個題材，聽到大綱都有啲抗拒，𠵱家接咗，係好想去push自己。」
未來篇：可以叫我老闆
明星轉會是常事，跳槽跳來跳去不出奇，近年則興起自組經理人公司，自己話事。劉心悠今年自立門戶，「𠵱家身邊嘅人會開玩笑叫我：『劉~老~闆』，好唔習慣，但都好開心！」升格做波士，第一件事設計公司logo，方便將來派卡片；其餘時間，和平日一樣，「其實我嘅生活冇太大改變，係多咗一份憧憬、多咗一個好大方向嘅目標。」人的方向是開拓內地市場，公司的方向是定了一個營業額。
愛情篇：我未開得車！
33歲的劉心悠，24歲由台灣來香港發展，一下子9年過去，青春美女卻是緋聞絕緣體，傳過的只有拍劇、拍片的拍檔，如《步步驚心》時的鄭嘉穎、去年余文樂等。
劉心悠自認愛情觀很灰，仍未準備登上戀愛列車，「呢方面我係幾灰，舉例就係，好似我想學電單車，但𠵱家我係未識得撻着呢架車，其他人learn緊、學緊點樣去揸得快啲，而我係仲未開得車，仲未可以handle到架車重量。」
不設定身高、樣貌、地域，甚至價值觀，只想找一個能明白她工作也有無奈的人，「我體驗好深，因為工作，我會miss佢哋嘅重要日子，好似母親節、聖誕節。」最遺憾是幾年前，80多歲嫲嫲在台灣離世，身在香港拍片的她，錯過見最後一面，「屋企人話，佢到最後一刻都仲等緊我，我屋企人已經要接受咁樣，何況你想同佢一齊嘅人。」
更多精采時尚內容，盡在 http://add.appledaily.com。
【壹錘定音 . 李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk