政府日前開會討論削減自由行人數20%的影響，唔知有心定無意，消息走漏咗，一眾零售及收租股立即腳軟。以現時社會氣氛，其實市場已有心理準備政府或會出手。有本港奢侈品零售商老闆，吹水時已打定輸數，坦言呢幾年行家過得太舒服，無咩危機意識：「大家好似忘記自由行係政策，隨時有一日可以變。」
做生意，從來都是商家搵方法適應市場變化，唔係要求個市場去谷增長畀你。就算政策沒有轉向，近年旅客消費持續減少、藥房和金舖開到一街都係，這些線索，早已話你聽市場係危機四伏。如果咁環境下，你仍然選擇採用進取策略，賺盡自由行每一分錢；那今日，你就理所當然要承受「轉身慢」的風險，接受這次調整陣痛。
減20%自由行，對零售影響有多大？如果政府是透過限制「一簽多行」形式，主力減少day trip客，由於他們消費力低，故影響會較輕微；即使day trip客減半，對零售業造成的損失，估算唔會超過200億，佔去年整體零售額不足4%。如果政府選擇「一刀切」、連過夜客都cut埋，咁影響就大好多，連鎖效應亦較顯著。
以政府向來做事都「高開低收」的情況睇，海迪覺得有啲「狼來了」feel，最後推出的措施，多數唔會減到20%。這不是零售商的末日，只是調整在所難免。
海迪
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk