近年成日聽到話報紙已經係夕陽行業，勢必被網絡媒體取代，真係聽到心都寒埋；不過，最近有兩單新聞，令我發現或者可以喺報業殺出條新血路，就係推出「替偶像打氣廣告套餐」。
韓風勁，《星星》嘅都教授金秀賢更加成為萬人迷，早前就有香港嘅「金粉」富婆Cecilia，豪花近30萬港紙，跨境喺韓國《朝鮮日報》刊登全版廣告，以韓文及英文預祝金秀賢喺第50屆百想藝術大獎得獎。喺星期三，中國嘅《新京報》亦有全版廣告，向啱啱掛靴嘅國際米蘭阿根廷後衞辛尼迪致敬。據講，係中國嘅國米球迷自發兼自費為辛尼迪賣廣告致敬及送上祝福（圖）；喺廣告度仲大大隻字寫住「向傳奇致敬！」，以及「看着你踢球成長，謝謝！」等字句。
網絡或者電子傳媒雖然係好流行，但講到震撼性及實在感，就始終都唔及有大大張報紙嘅實物廣告咁有效。如果呢種風氣成為潮流，喺巴西世界盃展開後，我哋可能見到有人向球星示愛嘅全版廣告，又或者係替愛隊打氣嘅跨版廣告呢！
文：吾中
以女性角度看球星新聞，唔用眉筆用原子筆寫低球壇百態！
【壹錘定音 . 李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk