丹麥上市嘅首飾品牌Pandora，於2011年前因為錯估市場，加上定價太貴，令股價太跌，更試過單日勁瀉65%。估唔到事隔近三年，Pandora已經鹹魚翻生，自2012年起，股價升咗大拿拿七倍！記得上年先開始留意Pandora呢個品牌，第一個感覺係，啲串珠又唔係特別靚，我去深水埗都搵到啦。
不過，可能佢廣告功力太勁，望望下又好似順眼咗，咁除咗證明女人的確善變外；亦反映Pandora自上年換新CEO後，的確走對了路，最起碼宣傳力度夠，成功令品牌年輕化。當唔少少女收到Pandora首飾後會上facebook post相，你就知呢個品牌已成功上位，有番咁上下地位。不過，Pandora最勁係佢識捉心理！你喺佢度買一隻手鈪連幾粒珠，最多使你幾千蚊。不過，當你有日行過，見到有粒珠幾靚，你又會想用幾百蚊去買。買下買下，你就會諗不如儲一個系列，結果儲開就有癮。幾百蚊粒，買10粒都幾千，對你來講，小數怕長計，但對Pandora就好襟計。
你只要於Pandora消費一次，就好太機會成為長期擁躉，customer loyalty就這樣輕易建立。Pandora月中公佈，今年首季收入增長30%，按年多賺60%，更令股價連創新高。手機轉珠Game好賺錢咩？其實Pandora都係玩同一條橋，令你「轉珠」轉上癮。
Fifi
本欄逢周二、四刊出
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk