與紡織H在Harvey Nichols飲下午茶，佢當然知道德國工程師、設計師冇得彈，好佩服人地敬業樂業，唔會一窩蜂咁轉去薪酬較高嘅行業。佢話德國工業界有一套嚴謹學徒制度，工匠（師傅）資格嘅認受性不下於註冊工程師，工廠新血源源不絕咁接下上一代棒子。香港與內地年青人唔鍾意做廠，有其原因，但父母壓力亦好大，紡織H舉自己工作請人嘅具體例子。一個就係請咗一位叻女大學畢業生，對佢寄以厚望，點知叻女父母猛話要入金融界先至有前途，阿媽日日嘈，叻女卒之走去中環搵到份工以滿足父母期望囉。幾年前佢同樣請到一個叻女，做得相當好，但一年後就俾父母哦到去考政府工，話做廠冇前途喎，結果呢位叻女真係考到AO，父母攬住佢錫。咁講法，紡織H點樣搵到人才？紡織H話，年青人理想常被父母之過時期望所扼殺，有志者就係未必一定聽父母安排之人，佢夠運請到兩三位讀書成績平平無奇嘅大學生，佢地去唔到中環，考唔入政府，得紡織H聘用，已非常感激，於是在工廠用心做，好快就證明到自己係可造之才，紡織H將佢地列入核心第三梯隊。
經紡織H一提，左丁山就有啲慚愧，想當年，自己人生第二份工就係在荃灣返染廠，做咗一個月就有銀行請，於是急急鬆人，從此轉戰中環，至今一事無成。有一位前輩曾經教訓過左丁山：「你如果在紡織界做得耐，好有機會與衝動去開廠，從山寨做起，成為大老闆，但係揀咗做銀行，做得更叻都唔可以開一間新銀行嘅啦！」瘀事唔想再講，講吓人地嘅威水史。五月十二日中大頒發榮譽院士予陳鎮榮、朱恩餘、顧鐵華、林榮德、梁鳳儀、王冀、黃桂林等六位對中大有貢獻人士，其中林榮德係新亞校友（工商管理系1975），佢就係紡織界一位出色人物，現任互太紡織控股有限公司執行董事兼行政總裁（Pacific Textiles Holdings Ltd，上市公司），佢在2008年開始出任新亞書院校董，幾年來不斷捐錢回饋母校，每年都超過7位數字，資助籌建新學生宿舍、校史館、網上史料庫等等，係一位財才兼備及滿懷新亞精神嘅校友，可見做廠有出頭，現代父母不必郁吓就反對子女入廠。
【壹錘定音 . 李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk