【壹週刊】759阿信屋靠賣日本零食抵抗超市霸權，今年分店即將突破二百一十間，本刊上週到日本直擊，為大家揭開阿信屋日本採購的成功之道，發現原來阿信屋靠一一年日本311大地震後大量入貨，成功取得日本供應商的信任，變相取得大部份日本零食的獨家貨源，成功在零食界殺出一條血路。
本刊一連四日參觀咗六個地方，包括港人熟識嘅築地魚市場，另外仲有樂天熊仔餅廠、大田魚市場、阿信屋熱賣產品海膽燒餅嘅製造商鐵火燒米菓廠、Yomayoshi薯片廠同埋上野零食街。發現阿信屋為咗取得大量新貨，專搵當地弱勢中小企，幫助對方做出口生意，成功取得對方信任，其中喺東京某大食品供應商，更感激阿信喺地震時期繼續大量入貨，幫助佢度過難關，所以合作三年以來，一直只係供貨俾阿信屋，百佳惠康甚至一田搵佢哋攞貨，佢哋都堅決say no。
阿信屋老闆林偉駿話同日本做生意一切講個信字，但同韓國人做生意，就要預咗俾對方起飛腳，所以要不斷搵新貨源，以免被市場淘汰。
iPhone App免費下載： http://bit.ly/nextplus_iphone
Android App免費下載： http://bit.ly/nextplus_android