港台員工噚日可謂一吐多年污氣。何解？因為官方正式出稿，宣佈署任咗助理廣播處長一職超過兩年嘅施永遠，終於正式坐正做AD！施永遠啱啱坐正，港台電視大廈就有臭味贈興，事關大廈化糞池有零件壞咗，搞到部份辦公室臭氣沖天。唔知係施永遠腳頭好、抑或港台中人「忍」得太久？
化糞池壞泵 臭氣沖天
有港台行家話，噚日嘅港台電視大廈，喺大家為施永遠終於坐正嘅喜氣洋洋下，滲入咗一啲異味，因為大樓個化糞池有個泵壞咗，搞到剪片室臭氣沖天，仲殃及其他辦公室，相信施永遠呢個坐正之日，特別「難忘」。有港台員工覺得否決港台新大樓撥款嘅建制派議員，好應該親臨參觀，等佢哋親身「體味」佢哋嘅工作環境。
其實施永遠喺2012年3月已經署任助理廣播處長。一般只要署任半年就可以升正。點知當年9月反國教風暴熾熱，教育局官員唔肯出席《城市論壇》，搞到發生擺空凳事件，之後施永遠嘅署任期一直被AO署長鄧忍光拖延。
施永遠曾經忍唔住大呻，感到鄧忍光要佢做政治任務。唔少港台員工覺得噚日呢份通告，證明鄧忍光遲遲唔肯升正施永遠係一個錯誤判斷。
李八方
mailto:[email protected]
【壹錘定音 . 李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk