去年12月升呢做人妻嘅裕美，今年3月尾同老公林恩浩到澳洲度蜜月，並展開為期一年嘅working holiday，點知喺澳洲打工受騙！噚日身在澳洲嘅裕美接受電話訪問話：「我哋喺網上搵工，睇到有農場請香港、台灣同韓國人，見網頁講得幾吸引：『Do you need money？Do you need experience？』一個鐘20蚊澳幣（約143港元），我哋打去就請人，好開心。」
人工倒貼
還以為搵到好工嘅裕美，竟然墮入陷阱，佢話：「佢哋話未到旺季冇得日日返工，廣告話20蚊係睇你表現，仲指定要我哋住喺嗰度，每人125蚊澳幣（約895港元）一星期租金，佢話設備好，有wifi，點知上唔到網又冇熱水沖涼，仲要畀200蚊（約1,431港元）工作按金，一星期返三、四日工，每日做6個鐘，後來發覺唔對路，我哋話再唔畀糧同按金就報警，做咗兩星期兩人夾埋得90蚊（約645港元），但要交125蚊租金，根本係倒貼。」
裕美呼籲大家喺澳洲搵工要小心：「暫時我哋做咗士多啤梨farm同蘑菇廠兩份工，覺得工頭好鍾意撩女仔，但勁惡對我老公，甚至用刀指住我老公。不過呢個係好經歷，當上咗一課，我哋呢年都會繼續搵工做，返嚟寫書。」
撰文：馮仁昭
【壹錘定音 . 李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk