本港大孖沙近年陸續定出交棒大計，66歲嘅瑞房（272）主席羅康瑞好似冇乜聲氣，但原來佢嘅大女Stephanie，前年9月已經加入公司，𠵱家人在上海，喺籌備緊上市嘅中國新天地做產品發展總監。
黃勤道先斬後奏
羅康瑞噚日聲稱，事前唔知阿女入公司做，話係中國新天地行政總裁黃勤道嘅主意，黃勤道同佢個女傾掂數先通知佢。
黃勤道就話，之前應老闆要求，成立中國新天地，需要搵個前衞又見慣世面，識得消費嘅人做產品，佢睇中Stephanie讀建築出身，特別適合，於是請佢幫手。Stephanie畢咗業9年，之前一直喺歐洲同新加坡工作，為人低調。黃勤道大讚老闆女幫公司物業改進同增值，做得非常好。
羅康瑞曾經講過，繼任人要喺內部挑選，即使仔女入瑞安，都要證明有能力，否則不如做股東。難怪佢噚日否認安排阿女接棒。
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk