公關大姐大叫左丁山去蘇杭街食靚飯，蘇杭街邊度有名店呀？於是推佢話：「嗰日我要去陸羽。」大姐大大喝一聲：「May姐親自下廚呀，你估機會時時有呀，食少一餐陸羽得唔得？」May姐下廚？邊位May姐呀，商台陳淑薇識煮靚飯嘅咩？未聽過。大姐大見左丁山好似懵到上心口，於是俾貼士：「今次May姐一定唔會用雞汁。」呵呵，明白嘞，幾年前May姐在半山住宅請吃晚飯，一吃難忘，今勻請去蘇杭街吃午飯，行多幾步就到啦。
蘇杭街條街好短，街道中段有一間大舖頭叫做Alno，有兩三千呎咁大，係新開嘅，賣甚麼貨品呢？就係最新科技／環保科技德國名牌廚具與煮食工具，全部用電，線條優雅，睇完一定讚不絕口，可惜如果廚房冇番三百呎或以上，都幾難容納，女士一見鍾情都冇用。不過工作人員保證話：「如新屋裝修或者全屋翻新，我地可以上門量度尺寸，度身為『廚房』訂造廚具。」呢樣服務當然好，不過如此高檔產品，都係超級豪宅先至配得落。超豪宅主人買此類廚房裝置，肯定被人稱讚有文化，有taste。
May姐（馮美基）在德國高科技電磁爐、焗爐、蒸爐配合下，現場表演功架，頭盤係炸釀雞翼（釀蔬菜），湯係原隻椰青佛跳牆，主菜係栗燒東坡肉配芝麻醬菜卷及白飯，甜品就是熱情果焦糖燉蛋，全部中菜西吃，May姐自由發揮，一滴雞汁都唔使用，一眾食客無不拍爛手掌，只可惜現場好似冇錄影，不能重溫情況了。
May姐話呢次用德國電磁爐燜腩肉，電磁鑊炸雞翼，高溫蒸爐炖佛跳牆，感覺係過程愉快，唔使俾煤氣爐熱到身水身汗，兼且煮食工具皆有時間掣，佢校好時間就唔使睇火，可以同時兼顧幾味餸，一言以蔽之，呢類德國產品，直情係入廚人士（不論男女）嘅大恩物。
左丁山入廚房只識煮個即食麵，冇資格講嘢，呢次叫做增加見識，無法子唔佩服德國工程師與設計師心思縝密，竟然製造出一系列同時適合炮製西餐與中餐嘅廚房新產品。食完之後就由蘇杭街行去置地廣場嘅Harvey Nichols咖啡店與紡織H飲下午茶，紡織H讀工程出身，同佢傾乜，不便細說，可以透露嘅，明天再寫。