國泰航空（293）與旗下港龍航空近月不斷跟著名食肆合作推出飛機餐，搞花臣留客，繼國泰與米芝蓮一星餐廳Tosca、港龍與老牌西餐廳希戈（Hugo's）合作後，港龍噚日再宣佈跟米芝蓮餐廳新斗記推中式飛機餐，由香港飛上海、北京嘅所有客艙、其他個別航線嘅頭等或商務客艙𠵱家開始有得供應。
楊偉添夏天調往台北
港龍機艙服務總經理黃文傑指，雙方花咗超過一年時間商討合作，仲要調校菜式，例如研究點樣整，先至可以保持斑塊夠脆口，可惜，新斗記嘅招牌菜式燒乳豬因保存與口感問題而未能喺飛機上供應。新斗記老闆仇詩傑亦伺機拉生意，佢投資嘅一款樽裝水，𠵱家喺個別超市有售，佢希望將來可以喺港龍飛機上都有得供應。
另外，港龍行政總裁楊偉添將於今夏調去台北，負責台灣與韓國市場，佢笑言，家中冇貓、冇狗、冇魚、冇小朋友，喺太古集團多年，楊太都習慣跟佢四處「漂泊」，佢調去邊就跟住去邊，咁佢當然都會唔捨得一齊工作3年嘅港龍同事啦。