「玩具大王」蔡志明向來鍾情九肚山低密度豪宅，聽聞單係山上收租豪宅已經超過20幢，堪稱九肚山大地主。雖然話樓市氣氛都係麻麻地，但係蔡志明手揸咁多件豪宅，一於少理，繼續收租至上。有消息話，佢最近先租出至少3幢豪宅，每幢月租要5.5萬至6.5萬元，每幢都有2,000呎至2,300呎，實用呎租要28元至33元。
聽代理講，蔡志明𠵱家喺市場仲有兩幢獨立屋放租，一幢係寶松苑（天后女歌手王菲都曾經係呢個屋苑嘅業主）入面嘅單號屋，間屋實用面積2,106呎，有成2,500方呎巨大花園，仲有個600呎天台，獨立車房，月租7萬元。另一幢係喺松柏花園入面，實用面積細少少，得1,610呎，花園1,400方呎，都係叫7萬元。如果大家好驚摸頂入市，但係又想試下豪住，或者可以豪租大屋體驗一下。