問：𢭃18萬3千的人工，但點解都無人識梁敬國？
答：你唔好以為18萬3千係好高人工，呢個只係副局長嘅最低薪酬標準，可以話係最低工資。工資最低，知名度低，好正常。
問：知名度咁低的問責官員，好事定壞事？
答：梗係好事，你問下彭順，如果佢可以再低知名度一點，個樣再少人認得一點，就唔駛俾記者認到佢背住老婆李心潔偷食嘅相片啦。
問：對唔住，彭順係……
答：彭順彭發兩兄弟其中一個啊！
問：我一直以為彭順彭發係一個人嚟㗎……
答：如果梁敬國喺大陸做官，出到街無人認得，就算妻妾成群，名錶滿身，對面相逢也不認識，不怕被民眾影相擺上微博報寸揭發。
問：但身為問責官員，連立法會主席都不認識，真的無問題嗎？
答：你以為高知名度的官員就是好官？難道你覺得問責團隊中最出色的就是劉江華？自從恐嚇完老師佔中會飯碗不保，真係連學校掃地嗰個校工都認得吳克儉，莫非佢又係一個好問責官員？你問下邱誠武，不知幾想同梁敬國交換位置，我寧願無人識我，都唔想再同政府港鐵打籠通講大話欺瞞市民啦。
問：其實副局長嘅職責係乜？
答：你想要表面答案，定係真實答案？
問：表面答案。
答：副局長係協助局長處理政策事務、向立法會及公眾解釋游說……
問：夠啦，好悶，真實答案呢？
答：話俾人知，呢個世界唔怕死嘅人其實仲有好多，梁振英政府好受歡迎，可以吸引到人才加盟㗎！你睇，我地填滿咗幾多個副局長個位！
問：難怪梁敬國加盟政府，傳媒話佢「逆流而上」，仲話佢「勇氣可嘉」。