早前本報獨家報道咗八両菜（何顓彤）力數八両金三宗罪，話八両金翻大陸搵「二奶」、冇俾家用同埋對個仔洗腦。及後囝囝八両仔（葉小霆）都有出嚟力撐老竇，仲話媽咪好偏激，係想博好感先嚟話八両金。
八両金近日就接受咗雜誌嘅訪問，佢更發誓自己冇做過任何對唔住八両菜嘅事。
對於被指有「小三」，八両金呼冤話嗰時生活環境走下坡，逼於無奈先返內地搵食，接完呢個騷又接下一場。佢承認當年大家性格都好火爆，為咗搵食見面少咗，摩擦多咗，性格唔夾。但就講明一定冇第三者，仲話離婚15年，一直都仲係單身就係最好嘅證明。
除咗「沙沙滾」呢個問題，八両菜又話八両金冇俾家用。訪問中問到當年八両金到底俾幾多家用時，佢就欲言又止咁話實際幾多唔好講，但男人大丈夫，一個女人嫁得俾佢，佢一定有膊頭有腰骨擔起頭家，照顧屋企咁話喎。
八両金又澄清當年未有開過地產代理公司，當年八両菜有意投身地產行業考經紀牌，最後八両菜係受聘於佢家姐公司旗下，但薪金幾多佢就毫不知情。佢仲話如果大家一齊，佢對天發誓一定係俾最好嘅八両菜，見大家各自生活，又知佢有一排環境唔太順利，所以先話俾千零蚊八両菜買衫過年。
講到囝囝嘅問題，八両菜指摘八両金利用囝囝巴結富商認契爺攞著數，又話佢洗囝囝腦，八両金就話自己成日四圍去出去做嘢，真係唔知道邊一次可能永遠返唔到屋企。八両金謂，囝囝又乖又得意，啲朋友好鍾意佢，故此一早幫個仔「搵定」契爺，某程度係幫佢「做準備」；萬一八両金有乜事，都有人可以照顧到八両仔咁話喎。