政壇「技安」、平機會主席周一嶽最怕邊個？「明X社」？錯！「X文化學會」？錯！最近榮登周主席「眼眉跳排名榜」第一位嘅，原來係後起之秀──破過產、離過婚，但撐「一夫一妻，一生一世」嘅超熟女李偲嫣。
舉「男女不分」標語被投訴
個仔讀緊大專但仍然做緊神秘組織「油尖旺區家長教師會聯會」會長嘅李偲嫣，繼撐國教、反佔中，同狙擊林慧思老師之後，近日頻頻出動，全力反同，上個月喺立法會聽證會上面，除咗大鬧周一嶽令同志變成特權階級，反同者變成二等公民，仲舉高寫住「男不男，女不女，男女不分」嘅標語。
佢把口咁毒，令到公眾側目，跨性別人士震怒，有變性人事後向平機會投訴佢，周旋咗整整一個月，結果平機會覆番投訴人，話因為搵唔到李嘅地址，寄唔到通知信畀佢，所以處理唔到，激到投訴人紮紮跳。
聽投訴人講，平機會話自己無刑事偵查嘅權力，試過問立法會攞李偲嫣嘅contact，但被拒絕，惟有叫投訴人用自己network幫幫手去搵個地址返嚟。投訴人於是print咗一大堆佢喺梁美芬office返工嘅新聞報道畀平機會，但會方質疑啲資料未update，投訴人話：「佢一日到黑周圍去呢度去嗰度搞人，要搵佢有乜嘢咁難呀？」
平機會話個案係有一定進展，暫時亦未遇到特別困難，咁八方就放長雙眼，睇吓周主席如何惡戰李偲嫣。
李八方
mailto:[email protected]