英格蘭、烏拉圭同哥斯達黎加要小心！意大利前鋒巴洛迪利（圖）日前放咗段打拳短片上網，見到佢赤裸上身，大騷一身肌肉。巴神拳拳到肉，同佢操拳嗰位朋友都唔敢硬碰，且戰且退，睇落佢好「弗」咁喎！但巴神到時最緊要記得，踢波係用腳嘅，唔好突然發癲打人拎紅牌就得嘞。另外，中場派路真大牌，下個月4號友賽完盧森堡後，佢就會坐私人飛機返都靈，同祖雲達斯續約兩年。