監警會噚日舉行研討會，與會人士及職員都掛上名牌，方便打招呼。八方睇到一男士掛住Chu Man Kin名牌，係監警會職員，在場打點。八方好醒咁走埋去，提佢係咪掛錯咗監警會秘書長朱Sir個名牌？誰知原來係八方搞錯咗，原來呢位先生真係叫Chu Man Kin，不過佢個中文名係朱文建，而非朱敏健。
朱文建曾任海關監督，都是執法調查的精英，兩年前退休，一年後加入監警會擔任審查主任。另外主席翟紹唐卸任在即，特別風騷，講稿暗寸問責官員冇人叫得出名；佢話民調顯示超過半數被訪者知道監警會，同政府比，有啲副局長、政治助理，甚至局長都冇乜人識。