地產代理監管局喺1997年樓市高峯期成立，歷任四名行政總裁（CEO），上任CEO伍華強只係做咗一年多，舊年12月忽然話唔撈。經過幾個月遴選後，最後都係由現任署理行政總裁韓婉萍升正做第五任CEO。
地監局表示，共收到70份入職申請書，遴選委員會最後揀選三人面試，最終認為韓婉萍係最合適人選，任期由6月1日起。韓婉萍從事執業律師20年，專長房地產、商業同信託策劃等事務，過去8年出任地監局服務總監，今年1月獲委任為署理CEO。
地監局之前4任CEO都係從外間招聘，即使接到70份申請，今次都係喺內部揀人，屬咁多年來首次。佢將會跟主席陳韻雲並肩作戰，監察3.5萬名地產從業員。
韓總雖較為低調，但愛聽業界對監管局嘅意見。華華曾向佢提及，傳媒查詢時，地監局好耐先回覆，佢話可以研究下，之後真係好似快咗回應。