《六四25周年》
【本報訊】在西貢泥涌燒烤與放風箏，是曾在89年六四後經「黃雀行動」營救後，入住西貢「安全屋」少男少女的娛樂。身為泥涌營長的Tiger，原來曾在當時攝錄營友生活片段，並自行剪接製成短片《泥營生活》。錄影帶原已損壞，早前卻經專家復修後「翻生」，珍貴片段25年後首度曝光；泥涌面目全非，中共高壓卻依舊。
記者：許偉賢
自言當年「誤打誤撞」、因為發現有民運人士匿藏在其深圳貨倉而加入黃雀行動救人的Tiger，當年是西貢泥涌安全屋的營長，負責照顧營友的起居飲食，也留意他們的心理質素，「困喺間屋係會好悶，佢哋好多時都想出去……試過有次有個人成晚唔見咗人，第二日至返，原來係出咗去行吓散心，我哋幾驚佢俾人捉返內地」。
為免節外生枝，Tiger叮囑各營友只能在營舍附近的地方活動，結果營外的泥灘與燒烤場，成為逃亡者的心靈慰藉之地。「當時佢哋好鍾意去泥涌燒嘢食，仲鍾意放紙鳶，會去恒安邨買紙鳶嚟玩」。
部份營友貪玩「搞搞震」
Tiger當年靈機一觸，攝錄營友的生活片段，供他們觀看自娛，「嗰時我用咗部Sony大機拍㗎，仲喺屋企用兩部機（錄影機），用『前進』同『暫停』兩個掣土炮剪接，配咗一段中國古典民族音樂做配樂，套片叫做《泥營生活》，片尾記攝於89年12月」。
有關錄影帶一直不知所終，卻在早前被發現，並宜經專家搶救之後還原，在六四25周年首度曝光。短片全長近18分鐘，Tiger提供當中近7分鐘、關於戶外活動的片段可見，包括名為宋燕珠的青年男女在燒烤；也有女子在泥灘放風箏，少男充當攝影師為女子留倩影。也有一對男女依依在泥灘邊漫步。現場流露了不少青春的笑容，畢竟那時要逃亡的人，極多也是花樣年華的學生。
「有時佢哋真係貪玩、唔係專登嘅，有啲搞搞震，好似會去（營舍附近）土地公神主牌前，攞人哋供奉嘅蘋果同橙嚟食……我知道後就要即刻盡快買返嚟補充番。」Tiger當時每天還會委派四人到恒安邨買餸，「當佢哋係民意代表，知道晒所有人口味」。
村民得悉身份後願協助
營友不時出入，引起村民注意。當時一位在威爾斯親王醫院任女工的村民，由於懂得念普通話，與營友溝通後得悉他們的身份，「佢好好，知道後仲話要送錢幫佢哋；嗰時成個香港好支持學運」。
重訪故地，感觸良多。泥涌環境大變，女工村屋被拆掉，惟中共高壓管治卻依舊。Tiger說：「過咗咁多年未平反，覺得有啲失望。」
對於近年建制組織扭曲後聲稱的「六四真相」，Tiger極度反感，「我覺得嗰班人講嘢係荒謬，事實勝於雄辯」，Tiger強調自己是愛國愛港，「但我係喺民主基礎上愛國愛港，唔係喺一黨專政下愛國愛港」。
【六四25周年專頁】燭光不滅，血仍未冷，民主中華，花果漂零。蘋果請你一同見證：良知，從未貶值！ http://64.appledaily.com