提起唐英年，大家除咗想起佢最鍾意嘅紅酒，應該仲有自訂車牌，當年佢做財爺嗰陣推動自訂車牌計劃，計劃2006年實施後，馬路上多咗好多別出心裁嘅車牌，唔少城中富豪亦都整番一兩個，個別車牌仲代表佢哋個大名，就咁望一望又未必想起，高調得來又好鬼低調。
有「名牌潘」之稱嘅廸生創建（113）主席潘廸生，每次出席公開場合都經過悉心打扮，佢架車嘅車牌亦都諗過度過，呢架掛住「DP」車牌嘅白色勞斯萊斯，登記地址就係廸生創建寫字樓，DP應該就係潘廸生英文名Dickson Poon嘅簡稱。
洪永時勞斯萊斯係「SH」
路易十三（577）聯席主席洪永時，早前喺中環街頭大晒佢部「土豪金」林寶堅尼，查實佢仲有其他外型獨特嘅靚車，好似呢架白色襯黃色勞斯萊斯，車牌「SH」，正好代表洪永時英文名Stephen Hung。
東亞銀行（023）主席李國寶嘅英文名係David Li，亦有個「DL1」車牌（此車牌應喺自訂車牌計劃推出前買入），6年前借畀朋友結婚用而曝光。超人李嘉誠亦有玩埋一份，車牌「LKS」與「CKH」嘅註冊地址都係長江中心7樓，即係超人寫字樓。
要講最經典嘅自訂車牌，當然係華置（127）前主席劉鑾雄2006年以140萬元買入嘅「1 L0VE U」啦。
李華華
mailto:[email protected]