要數網絡世界近期最經典，肯定唔少得喺港鐵違規食嘢仲要惡人先告狀嘅「厚多士姐」。佢段四分半鐘鬧人短片，喺YouTube有成76萬次點擊，厚多士姐嘅半鹹淡廣東話，仲將「多事、梁振英同食錯藥」，演繹成「多士、洋葱圈同食菜肉」，帶挈呢幾款食物無端端變成潮語、潮食。
厚多士姐嘅二次創作，已經唔單止有漫畫、rap歌，噚日八方仲收到線報，有餐廳真係推出咗厚多士拼洋葱圈套餐（圖）。呢間咁多事玩厚多士姐嘅餐廳開喺太古，餐廳嘅黃經理就同八方講，本身想諗吓嚟緊世界盃有乜新菜式，畀波迷一邊睇波一邊過吓口癮，點知忽然彈起咗個厚多士姐，人人開口埋口都係厚多士呀、洋葱圈呀，就索性溝埋佢做套餐啦。
黃經理話，餐廳兩間分店入面，只係得太古分店有得賣厚多士拼洋葱圈特餐，兼夾每日限量20份。噚日第一日推出，淨係午市都賣咗10份，唔少西裝友見到個餐牌都猛話一定要試。不過呢，個餐要成42蚊，晚飯時間加凍飲要畀多9蚊，轉特飲仲要加多25蚊，都幾重皮喎！不如索性加到$68.9！