CVC亞洲大中華區主席梁伯韜(番薯梁)噚日以意馬(585)非執行主席身份出席股東會,佢喺會後冇講意馬呢盤生意,反而着力賣花讚花香,指CVC喺市場籌措資金夠快,意指旗下基金受投資者歡迎。
CVC早前落實買入內地飲食集團俏江南接近七成股權,番薯梁透露,呢個項目係以第3期基金嘅錢投資,佢哋舊年7月再推出第4期基金,籌集35億美元,未夠一年搞掂。佢話,有啲同業兩年前已經推出基金,直至最近先至完成集資,個別仲喺度籌緊錢,意指佢旗下基金受歡迎咁話。
不過佢唔肯披露基金回報率,只係話同業嘅平均回報率係20%。佢認為「市場唔好時,投資回報先最好」,但又補番句阿媽係女人,指市場動盪時,大家亦要做好風險管理。
佢好滿意香港寬頻呢項投資,暫時冇退出策略,除咗項目係咪成熟,仲要考慮其他因素,而且私募基金一般嘅投資期限係10年咁長。