I.T（999）上周公佈全年業績，表現遠勝預期，市場估賺1.9億元，它最後卻賺2.8億元，下半年度（9月至2月）無論是同店銷售增長還是毛利率，都觸底回升，存貨水平終於下降，仲要增加派息比率㖭！單憑這幾點，就足以令I.T上演「絕地大翻身」，上周五股價爆升17%，但即使如此，其今年預測市盈率仍不足10倍。
到底I.T的復蘇係咪可以持續？還是只屬曇花一現的數字遊戲？海迪作為一個消費者，近年幫襯I.T的數目急劇減少，原因很簡單：因為唔值。你到其他賣韓國衫的小店、代購網店、fast retail零售商，很容易就可用更低價錢，買到設計質量相當的服裝。久而久之，I.T在消費者「會去逛下」的優先順序中，越排越後，市佔率不斷流失。
但是，如果I.T肯減價的話，情況就唔同講法。去年聖誕減價才剛開始，海迪到I.T的分店逛了一圈，已見有貨品開始斷碼。有些服裝零售商，是商品出問題（如Esprit），就算大減價你都未必會買。但I.T唔係呢個case，它的商品有吸引力，只是定價缺乏競爭力。I.T毛利率已由以往高峯時的逾60%水平，降至現時58%左右。海迪認為這是結構性的改變，一如大家已習慣了只會在減價時才幫襯I.T一樣，故利潤率長遠而言，很難有顯著復蘇。錢，不會好似以前咁好賺了。
據說，I.T老闆沈嘉偉在上周的分析員會議上，點都唔肯評論今年度的銷售情況，就連減價多定少，都話「答唔到」。海迪相信這是沈嘉偉的真心話，I.T最壞的情況已過，但要在如此市況重新回復穩定增長，道路仍然係好崎嶇。
海迪