祖籍江蘇無錫嘅唐英年，原來家族喺遷到無錫之前住喺常州，稱為毗陵唐氏，係詩書禮儀之家，先祖荊川公更文治武功，抗倭救民，載入明史，非常巴閉。最近毗陵唐氏第二十世孫、現任新華社記者嘅唐師曾喺常州統戰部協助下，出版《百年毗陵唐氏》一書，講番唐家呢個常州顯赫家族嘅歷史，仲有一個章節講述毗陵唐氏第二十一世孫、即係唐唐，大讚唐唐係由商入政嘅佼佼者，又話佢好顧家，訪問期間曾感慨「家和萬事興」，最欣慰家族好團結，入面仲有好多珍貴相，包括唐唐童年照。唐老太尤淑圻亦喺訪問中大爆往事，話唐唐同佢兄弟喺外國讀書時，規定佢哋一定要用中文寫信返香港，仲會批改埋寄返畀佢哋睇，等佢哋唔好忘記中文。原來唐唐早前仲去咗常州出席呢本書嘅首發會，多謝常州送咗一份厚禮畀唐家。